La Internacional

La Internacional
Datos
Tipu	cantar
Idioma	francés
Xéneru	canción revolucionaria (es)
Lletrista	Eugène Pottier, Arkady Kots (es) , Henriette Roland Holst, Kálmán Kalocsay, Xiao San (es) , Charles H. Kerr (es) , Takamaru Sasaki, Neno Vasco y Billy Bragg
Compositor	Pierre Degeyter
País	Francia
Fecha publicación	23 xineru 1918
Audio
Partitura	Partitura

La Internacional ye'l cantar revolucionariu con mayor sonadía d'ente los cantares obreros. La so lletra foi escrita por Eugène Pottier en 1871, y la música compúsola Pierre Degeyter en 1888.

Eugène Pottier yera un compositor y obreru de tendencia proudhoniana que llegó a ser miembru del Conseyu de la Comuna de París. El so poema La Internacional foi publicáu en 1887 dientro d'un recopilatoriu tituláu Chants révolutionnaires, y nel so aniciu taba dedicáu a Gustave Lefrançais, otru lluchador de la Comuna.

Nel añu 1888 G. Delory, unu de los organizadores de La Lyre des Travailleurs, taba interesáu en qu'esta coral enanchara'l so repertoriu de cantares socialistes y obreros y encargó-y a Pierre Degeyter que-y punxera música al poema. Ésti cola simple ayuda d'un armoniu, musicó La Internacional en tres díes. Depués de comentala colos sos compañeros de trabayu y de facer pequeñes modificaciones entrególa a La Lyre des Travailleurs pa la so estrana. Imprentáronse 6.000 exemplares de la primera y clandestina edición, algamando bien ceo gran sonadía, primero en Lille y depués nel restu Francia.

La Internacional foi cantada por primer vez en medios guesdistes en 1888, demientres l'axuntamientu de la Xunta Sindical de vendedores de periódicos en París. En 1896 el cantar foi adoptáu como himnu oficial de los revolucionarios el 8 d'avientu. Años más tarde, en 1899, toles Organizaciones Socialistes franceses, en acabando el Primer Conceyu Xeneral en París, adóptenlu como himnu de so.

En 1892 conviértese n'himnu de la Segunda Internacional y en 1910 cántase por primer vez nel Congresu de Copenhague por parte de tolos delegaos que lu convierten n'himnu de tolos trabayadores revolucionarios del mundu. Demientres la revolución rusa La Internacional yera'l cantar de los insurxentes y en 1919 Lenin oficializala na Tercera Internacional, siendo darréu adoptada como Himnu Nacional de la Xunión Soviética hasta l'añu 1943 nel que Stalin decide cambiálu por otru qu'exaltara meyor el patriotismu rusu.

La Internacional foi traducida a numberoses llingües y ye l'himnu de la mayoría de les organizaciones socialistes de tendencia marxista o comunista.